C. CASSIUS LONGINUS    ( AD 1st century )

( P. E. Huschke, Iurisprudentiae anteiustinianae quae supersunt, Leipzig, 1886, pp. 128-129 ).

1. Circa Padum cum ageretur, quod flumen ‘ ut torrens aliquando tam uiolentum decurrit, ut alueum mutet et multorum late agros trans ripam, ut ita dicam, transferat, saepe etiam insulas efficiat, Cassius Longinus, prudentissimus uir, iuris auctor, hoc statuit, ut quidquid aqua lambiscendo abstulerit, id possessor amittat, quoniam scilicet ripam suam sine alterius damno tueri debet ; si uero maiore ui decurrens alueum mutasset, suum quisque modum agnosceret, quoniam non possessoris neglegentia sed tempestatis uiolentia abreptum apparet ; si uero insulam fecisset, a cuius agro fecisset, is possideret ; at si ex communi, quisque suum reciperet. – Hygin., de gen. controv. in grom. vet., ed. Lachm., p. 124.

2. Ob haec consalutatus imperator Nero : et senatusconsulto supplicationes habitae, statuaeque et arcus et continui consulatus principi, utque inter festos referretur dies, quo patrata uictoria, quo nuntiata, quo relatum de ea esset, aliaque in eandem formam decernuntur adeo modum egressa, ut C. Cassius de ceteris honoribus assensus, si pro benignitate fortunae diis grates agerentur, ne totum quidem annum supplicationibus sufficere disseruerit, eoque oportere diuidi sacros et negotiosos dies, quis diuina colerent et humana non impedirent. – Tacit., A. 13, 41.