| LEX
TREBONIA DE TRIBUNIS PLEBIS ( 448 BC ) |
|
Livius, III, 65 ( Nisard, Paris, 1864 ). |
|
1. Noui
tribuni plebis in cooptandis collegis patrum uoluntatem fouerunt ;
duos etiam patricios consularesque, Sp. Tarpeium et A. Aternium,
cooptauere. 2. Consules creati Sp. Herminius
T. Verginius Caelimontanus, nihil magnopere ad patrum aut plebis
causam inclinati, otium domi ac foris habuere. 3. L. Trebonius
tribunus plebis, infestus patribus quod se ab iis in cooptandis tribunis
fraude captum proditumque a collegis aiebat, rogationem tulit 4. ut
qui plebem Romanam tribunos plebei rogaret, is usque eo rogaret dum
decem tribunos plebei faceret ; insectandisque patribus, unde Aspero
etiam inditum est cognomen, tribunatum gessit. |
| Livius, V, 10 ( Nisard, Paris, 1864 ). |
| 10. Inter
dilectum tributumque et occupatos animos maiorum rerum curis, comitiis
tribunorum plebis numerus expleri nequiit. 11. Pugnatum
inde in loca uacua ut patricii cooptarentur. Postquam obtineri non poterat,
tamen labefactandae legis Treboniae causa effectum est ut cooptarentur
tribuni plebis C. Lacerius et M. Acutius, haud dubie patriciorum
opibus. |
|
 |