| LEX
ATILIA DE TUTORE DANDO ( Before 186 BC ) |
|
Gai Institutiones, I ( Seckel & Kuebler, Leipzig, 1935 ). |
185. Si
cui nullus omnino tutor sit, ei datur in urbe Roma ex lege Atilia a
praetore urbano et maiore parte tribunorum plebis, qui Atilianus tutor
uocatur; in prouinciis uero a praesidibus prouinciarum ex lege Iulia et Titia. 186.
Et ideo si cui testamento tutor sub condicione aut ex die certo
datus sit, quamdiu condicio aut dies pendet, tutor dari potest; item
si pure datus fuerit, quamdiu nemo heres existat, tamdiu ex his legibus
tutor petendus est; qui desinit tutor esse, posteaquam aliquis ex testamento
tutor esse coeperit. 187.
Ab hostibus quoque tutore capto ex his legibus tutor peti debet;
qui desinit tutor esse, si is, qui captus est, in ciuitatem reuersus
fuerit: nam reuersus recipit tutelam iure postliminii. |
 |