| ~ NOV.
LXIII ~ DE NOVI OPERIS NUNTIATIONE MARINI ASPECTUS. ( AD 538 ) |
( Based upon the Latin text of Schoell and Kroll's edition ). ~ Text submitted by Dr. Ingo Maier ~ |
| Imp. Iustinianus Aug. Longino praefecto urbis Constantinopolis. |
<Praefatio> Causam
quae dolose fit in hac regia civitate circa domuum aedificia cohibere
et emendare iustum credimus. Quia enim certis mensuris distare domos
ab invicem Zenonis piae memoriae constitutio dicit, sed et nos aliquid
tale sancivimus, sequitur autem in hac regia urbe non posse aliquem
intra centum pedes prohibere maris aspectum, rem gratissimam: oportebat
quidem forsan et ex ampliori mensura aspectus eis patere et non eos
prohibere, sed tamen et in hoc inopinabili quadam machinantur arte.
Quidam enim centum pedum relinquentes mensuram aut etiam parvum aliquid
huic addentes deinde aedificant ibi nihil aliud habentes, sed tamquam
aliquod velum tendunt, et cum abstulerint maris aspectum per omnem potestatem,
et non repugnantes legi propter centum pedum spatium, interius aedificant
sine prohibitione; et dum quod quaerunt potiuntur, deponunt illud quod
propter utilitatem ab eis adinventum est, et ita schema circumvenientes
omni voluptate extraneas possessorum constituunt domos. Quod de cetero
fieri nullo volumus modo. |
| CAPUT I. |
Sed
si quis voluerit tale aliquid excogitare et malignari, non taliter ludat,
sed si hoc eguerit pro veritate, domum totam aedificet et usque ad spatium
totum (centum dicimus pedum) tendat, aedificia faciens tamquam necessaria
sibi et inevitabilia futura, non autem propter vicini laesionem construat
parietes et velut ex quadam pictura talem extendens machinationem privationem
aspectus arripiat. Sicut enim eos qui aliena diripiunt recte aversamur
et poena dignos putamus, ita et hoc molientes nihilo minores malitia
eorum qui etiam alienas res arripiunt aestimamus. Unde si parvam aliquam
rem per modum arreptionis auferre praesumenti bene faciens vi bonorum
raptorum cum quadrupli minatur poena, quomodo non et hunc necesse est,
qui tale aliquid egit, et cogi deponere quod ab eo factum est et alia
maiori poena multari, hoc est decem librarum auri inferendaram theatralibus
tuae celsitudinis, ut non malus vicinus (hoc quod in sermone est) constitutus
vadat deridens legem tamquam non valentem eum propriis inhibere dispositionibus. |
<Epilogus> Quae
igitur placuerunt nobis et per hanc sacram declarata sunt legem, tua
celsitudo in hac felicissima civitate operi terminoque contradere et
in perpetuum una cum oboedienti officio servare festinet, eadem hoc
est decem librarum auri imminente poena contra haec praevaricantes aut
praevaricari sinentes. Dat. VII. idus Mart. Constantinopoli, imp. dn. Iustiniani pp. Aug. anno XI., <Iohanne> v. c. cons. |
| |