| ~ NOV. LV ~ |
UT
DE CETERO COMMUTATIONES ECCLESIASTICARUM RERUM NON FORTUITE FIANT AD
PIISSIMUM IMPERATOREM ET HOC MODO AD ALIAS PERSONAS TRANSEANT RES, SED
HAEC TANTUMMODO FIANT AD IMPERIALEM DOMUM. ET UT LICEAT PERPETUAM EMPHYTEUSIN
AGI AB ORATORIIS IN ORATORIA DECRETO VIDELICET INTERPOSITO, EXCEPTA
HAC MAIORE ECCLESIA, NE TAMEN IN PRIVATAM PERSONAM TRANSEAT EMPHYTEUSIS. |
| ( AD 537 ) |
( Based upon the Latin text of Schoell and Kroll's edition ). ~ Text submitted by Dr. Ingo Maier ~ |
| Imp. Iustinianus Aug. Menae archiepiscopo Constantinopoleos. |
<Praefatio> Legem
scripsimus dudum ecclesiasticas quidem alienationes prohibentem, solam
autem commutationem permittentem sanctissimis ecclesiis nec non sanctissimae
maiori ecclesiae huius felicissimae civitatis, dum imperium accipere
aliquid ab aliqua venerabilium domuum voluerit. Postea siquidem aliam
scripsimus legem, qua excepimus sanctissimam maiorem ecclesiam, permittentes
quasdam alienationes, quas illa lex dicit. Quia vero cognovimus, eo
quod aliqui prioris constitutionis capitulum, quod de permutatione competentium
rerum sanctissimis domibus ad imperium scripsimus, ad artem legi contrariam
converterunt postulaveruntque nos quidem a sanctissima ecclesia accipere,
his autem haec dare, hinc adgressi sunt multi quidam similibus petitionibus
utentes sacram circumvenire constitutionem. Quaecumque igitur gesta
sunt a nobis usque ad praesentem diem, haec sub schemate quo nunc est
valere volumus, nullo permutando horum quae iam a nobis cum sanctissima
ecclesia in talibus contractibus gesta sunt aut cum his qui haec a nobis
perceperunt. |
| CAPUT I. |
De
cetero autem sancimus nulli penitus ullam esse licentiam aliquid tale
agere, sed illas solas valere permutationes quae in imperialem domum
in hoc factae sunt, ut perpetuo apud imperium maneant et non transferantur
ad privatum neque illarum ius per medium imperium ad eos proficiscatur.
Sed si quid tale fiat, licentiam damus reverentissimis oeconomis res
apprehendere huiusmodi et trahere eas rursus ad sanctissimam ecclesiam,
tamquam si nec ab initio contigisset permutationes harum ad imperium
factas. Sed servari hoc schema in perpetuum ex praesenti die incohatum;
omnibus quae dudum, sicuti praediximus, post priorem legem secundum
modum praedictum gesta sunt, ratis manentibus, eo quod illa quidem quae
sic facta sunt a viris gesta sunt ....., nunc autem quidam volunt illorum
exemplo utentes et nobis esse molesti et sanctissimam maiorem ecclesiam
huius felicissimae civitatis circumvenire. Quod per omne tempus nullo
modo fieri volumus: sed et si quolibet fiat schemate, hoc etiam infirmum
esse et a sanctissima maiore ecclesia in perpetuum vindicari, nulla
ei temporis praescriptione in hoc obicienda. |
| CAPUT II. |
Illud
quoque sancimus, ut aliis omnibus de iure emphyteoseos sancitis et in
sanctissima maiore ecclesia et in aliis omnibus venerabilibus domibus
proprium robur habentibus licentia sit sanctissimis ecclesiis et venerabilibus
domibus adinvicem emphyteosim agere perpetuam, decreto quippe hic faciendo;
excepta quidem hic sanctissima maiore ecclesia, in hoc autem celebrata
emphyteosi, ut non ad privatam personam extendi omnino possit. |
<Epilogus> Tua
igitur beatitudo quae uisa sunt nobis custodiat, et his qui sub ea metropolitanas
sedes habent faciat manifesta, ut et ipsi quae nobis placuerunt cognoscentes
nihil horum praevaricari praesumant. Erit enim universis a deo iudicium
et exinde poena, si quid praeter haec aut ipsi egerint aut agi permiserint. Dat. XV. kal. Nov. CP. imp. dn. Iustiniani pp. Aug. anno XI., post cons. Belisarii v. c. anno secundo indictione prima. |
| |