| ~ NOV.
LII ~ UT NON FIANT PIGNORATIONES PRO ALIIS PERSONIS. ET UT, SICUT PRINCIPUM DONATIONES NON EGENT GESTIS MONUMENTORUM, SIC NEQUE A PRIVATIS IN IMPERATORIBUS FACTAE DONATIONES INDIGEANT. ( AD 537 ) |
( Based upon the Latin text of Schoell and Kroll's edition ). ~ Text submitted by Dr. Ingo Maier ~ |
| Imp. Iustinianus Aug. Iohanni pp. secundo. |
<Praefatio> Inhonestas
pignorationes et odibiles super his exactiones plurimae quidem et aliae
leges odio habent, praecipue autem a nobis positae; sed nescimus quemadmodum
causa licet tantis castigata legislationibus adhuc praesumitur et in
republica est et maiorem sui praebet virtutem quam legum necessitas. |
| CAPUT I. |
Propterea
sancimus nullam omnino pignorationem in nostra republica praevalere,
neque in mercatis (hoc quod maxime ibi praesumptum invenimus) neque
in agris neque in civitatibus neque in vicis, neque in civibus neque
in vicaneis neque in agricolis neque alio omnium quocumque modo vel
tempore, sed praesumentem alium pro alio secundum pignorationis formam
aurum aut aliquid aliud exigere, hoc reddere in quadruplum violentiam
passo, et cadere etiam actione quam habuit adversus eum pro quo exactionem
fecit. Non enim habet rationem alium quidem esse debitorem alium vero
exigi, sed nec alteri molestum esse pro altero quondam tamquam invasionem
aut iniuriam committente, et alium quasi vicaneum existentem caedi aut
iniuriam sustinere et aliquid pati quod omnino non competit pro alio,
et absque legitima occasione quamlibet perferre calumniam, et supplicia
sustinere in corpore a praesidibus gentium: scientibus quia, si non
hoc egerint, sed in provincia cui praesunt pignorationes praesumantur,
nihil erit tale quod eos a nostris eripiat manibus. |
| CAPUT II. |
Illud
quoque perspeximus huic adicere legi, ut sicut ab imperio in alios factae
donationes non egent gestis monumentorum, sed ex hoc ipso habent virtutem,
ita neque a privatis in imperatoribus factae, si tantummodo pro veritate
fiant in publico a tabellionibus completae et subscriptionem habentes
et eius qui fecit et testium et aliam donationum observationem, non
egebunt gestis monumentorum, cuiuscumque quantitatis sint. Non enim
est consequens ut nec his fruatur imperium a privatis quae ab eo praebentur
illis. Haec autem inaequalitas facta est ex novitate quam Zenonis piae
memoriae introduxit constitutio, ut imperiales donationes non egeant
monumentis. Quia igitur imperfectius causa prius apparuit, propterea
nos perfectionem imponentes ei ex utroque tenere hoc volumus et in his
donationibus quae ab imperatoribus in privatis fiunt et a privatis in
imperatore, ut ex aequalitate iustitia causae adiciatur. |
<Epilogus> Tua
igitur excellentia quae per hanc divinam nostram constitutionem sancita
sunt, praeceptis propriis sollemniter manifesta facere studeat universis. Dat. kal. Sept. Constantinopoli imp. Iustiniani pp. Aug. anno XI. p. c. Belisarii <v. c. anno II>. |
| |