| ~ NOV.
CLIV ~ DE IIS QUI IN OSROENA ILLICITAS NUPTIAS CONTRAHUNT. ( AD ? ) |
( Based upon the Latin text of Schoell and Kroll's edition ). ~ Translated from the Greek ~ |
| Imperator Iustinianus Augustus Floro comiti sacrarum rerum privatarum. |
| Praefatio.
Mirus quidam rumor ad nos pervenit, eos qui Mesopotamiam et Osroenam
provinciam incolunt, audere illicitis nuptiis se iungere, atque romanas
leges violare et poenas in iis intentatas tam veteres quam novas, qui
cum ad vicinarum gentium mores respiciant, in illicitas atque prohibitas
nuptias incidant. Nos igitur horum quidem nihil omnino credidimus :
neque enim existimamus homines qui rei publicae nostrae pars sunt eiusmodi
quid agere audere atque progeniem suam dedecore afficere et nomina confundere. |
| I. Quare
et in ea inquirere, et si quid eiusmodi factum esset, delinquentes ad
extremum supplicium trahere voluimus. Verum quoniam et longum tempus
est neque eiusmodi delictum commissum esse credimus, si tamen quid eius
generis contigerit, praeteritum quidem, quocumque se modo habeat, iis
qui Osroenam et Mesopotamiam provincias incolunt indulgemus propter
invasiones in eas vario modo factas, et maxime quia agrestis multitudo
ut plurimum haec delinquere dicitur, idque in ea quae nunc est condicione
manere sinimus, cum nihil eorum curiose perscrutemur quae usque ad novellam
nostram sacram constitutionem hac in re forte peccata sunt, sed ut omnem
huiusmodi de hoc inquisitionem adversus personas et res quae ad incolas
earundem provinciarum pertinent prohiberi sanciamus. Post legem vero
nostram nuper hac de re latam si quis quid eiusmodi facere ausus fuerit
vel etiam audeat, eum extremis suppliciis subici volumus, sciatque is
nos in pecuniariis poenis non substituros, sed et ipsum et uxorem et
liberos ex illicitis nuptiis natos post nostram, uti dictum est, sacram
constitutionem persecuturos esse, et de capite periculum et de bonis
poenam iis inflicturos, nulli parcentes nec si maioris nec si minoris
sit condicionis aut fortunae aut sacerdotii (hoc enim etiam magis importunum
est), sed in omnes pariter animadvertentes solitum et Romanis legibus
dignum ordinem esse servaturos, cum non solum substantiae partem auferamus,
sed etiam totam substantiam et partem corporis, et si quidem vel importunius
contractas deprehenderimus illicitas nuptias, forte etiam ipsam animam :
ita ut nemo effugere possit ad vicinorum in peccatis exemplum sequendum.
Recta enim et quae decent sapere oportet ceterosque ad talem aemulationem
excitare, nec vero ipsos quae contra leges sunt agere et ad mutuam imitationem
confugere. Haec igitur custodiri volumus in praedictis provinciis, ut
tam civiles quam militares magistratus hoc custodiant efficiantque ut
poenae delinquentibus imponantur. Hoc ipsum autem iis qui in provincia
sunt ex praecepto tuo a propriis magistratibus per edicta manifestum
fieri volumus, nisi ipsi quoque extremis poenis subici velint et administrationum
et bonorum amissioni, si quid horum neglexerint. |
Epilogus.
Quae igitur nobis placuerunt et per hanc sacram pragmaticam formam declarantur
tua gloria ad opus effectumque adducere studeat. |
| Dat.
. . . . |
| |