| ~ NOV.
CLIII ~ DE INFANTIBUS EXPOSITIS. ( AD 541 ) |
( Based upon the Latin text of Schoell and Kroll's edition ). ~ Translated from the Greek ~ |
| Idem Augustus Eliae gloriosissimo praefecto Illyrici. |
| Praefatio.
Crimen a sensu humano alienum, et quod ne de barbaris quidem ullis referri
fidem habet, Andreas deo carissimus presbyter et apocrisiarius sanctissimae
Thessalonicensium ecclesiae nobis nuntiavit, esse qui infantes ex utero
prodeuntes statim abiciant et in sanctis ecclesiis eos relinquant, deinde
eosdem postquam a piis hominibus educationem et alimenta impetrarint
vindicent et servos suos esse pronuntient, atque cupiant suae crudelitati
hoc addere, ut quos in ipsis vitae primordiis morti tradiderint, eos
adultos privent libertate Quoniam igitur eiusmodi indignitas multa simul
complectitur crimina, caedem et calumniam et quaecumque quis in eiusmodi
facinore facile recensuerit, oportebat eos qui haec talia committerent,
vindictam ex legibus statutam non effugere, sed quo ceteri moderatiores
fierent, extremis poenis subici, quippe qui per impudentiam actionis
sua ipsi crimina deferrent. Quod quidem in posterum custodiri iubemus. |
| I. Quoscumque
igitur eum in modum in ecclesiis vel vicis vel aliis locis abiectos
esse probatum fuerit, eos omnibus modis liberos esse iubemus, etiamsi
actori certa aliqua probatio suppetat, qua eiusmodi personam ad suum
dominium pertinere ostendat. Nam si legibus nostris praeceptum est,
ut servi aegrotantes a dominis neglecti et quasi desperata eorum valetudine
a possessoribus curatione digni non habiti omnino in libertatem eripiantur,
quo tandem modo eos qui in ipso vitae principio aliorum hominum pietati
relicti atque ab iis enutriti sunt in iniustam servitutem trahi patiemur?
Verum his et sanctissimum civitatis Thessalonicensis archiepiscopum
et sanctam dei ecclesiam sub ipso constitutam et gloriam tuam opem ferre
et libertatem iis vindicare sancimus ; neve poenas ex legibus nostris
statutas effugiant qui haec agunt, utpote qui omni inhumanitate et crudelitate
referti sint, quae omni homicidio tanto peior est quanto miserioribus
eam inferunt. |
Epilogus.
Quae igitur nobis placuerunt et per hanc sacram formam declarantur gloria
tua et qui pro tempore eundem magistratum suscepturus est et officium
vobis obtemperans ad opus effectumque adducere atque custodire studeat.
Etenim poena quinque librarum auri imminebit iis qui haec violare temptent
aut violari patiantur. |
| Dat.
prid. id. Dec. CP. <imp.> dn. Iustiniani pp. Aug. <anno XV.>
Basilio vc. cons. |
| |