| ~ NOV.
CXXXII ~ DE INTERDICTIS COLLECTIS HAERETICORUM. ( AD 544 ) |
( Based upon the Latin text of Schoell and Kroll's edition ). ~ Text submitted by Dr. Ingo Maier ~ |
| Imperator
Caesar Flavius Iustinianus felix inclitus victor ac triumphator semper
Augustus edictum Constantinopolitanis. |
Primum
esse et maximum bonum omnibus hominibus credimus verae et immaculatae
Christianorum fidei rectam confessionem, ut per omnia haec roboretur
et omnes orbis terrarum sanctissimi sacerdotes ad concordiam copulentur
et consone immaculatam Christianorum confessionem praedicent et omnem
occasionem quae ab haereticis invenitur auferant: quod ostenditur et
ex diversis conscriptis a nobis libris et edictis. Sed quoniam haeretici
neque dei cogitantes timorem neque interminatas talibus poenas ex legum
severitate considerantes diaboli opus implent et quosdam simplicium
seducentes sanctae dei catholicae et apostolicae ecclesiae adulteras
collectas et adultera baptismata latenter faciunt, pietatis aestimavimus
per praesens nostrum edictum monere eos qui tales sunt, quatenus et
ipsi recedant ab haeretica vesania et nec aliorum animas per simplicitatem
perdant, sed magis concurrant ad sanctam dei ecclesiam, in qua recta
praedicantur dogmata et omnes haereses cum principibus suis anathematizantur.
Nosse enim volumus omnes, quia si de cetero aliqui inveniantur aut contrarias
collectas facientes aut apud semet ipsos collecti, nequaquam omnino
eos ferimus, sed domus quidem ubi aliquid delinquitur sanctae assignamus
ecclesiae, his autem qui colligunt aut qui apud se colliguntur ex constitutionibus
poenas interri omnibus modis iubemus. |
<Dat.
prid. non. April CP. <imp.> dn. Iustiniani pp. Aug. anno XVIII.
post cons. Basilii vc. anno III.> |
| |