| ~ ED. III ~ DE ARMENIORUM SUCCESSIONE. ( AD 535 ) |
( Based upon the Latin text of Schoell and Kroll's edition ). ~ Translated from the Greek ~ |
| Idem imperator . . . . |
Praefatio. Etiam
Armenios volumus pristina iniustitia liberatos ad nostras leges per
omnia deducere et convenientem eis donare aequitatem. |
I. Et
quoniam nuper cognovimus barbaricam quandam audacemque esse apud eos
legem neque Romanis neque nostrae reipublicae iustitiae congruentem,
ut masculi in parentum hereditatem succedant, feminae vero non, propterea
sancimus usi praesenti ad magnificentiam tuam sacra lege, aequales esse
successiones et quaecunque et de viris et de mulieribus Romanorum legibus
constituta sunt, haec etiam in 1 Armenia
obtinere. Idcirco enim nostras leges illuc transmisimus, ut eas respicientes
ita viverent. Quoniam autem quae praeterierunt omnia commovere absurdissimum
est, ideo statuimus hanc legem valere inde ab initio pii nostri imperii,
ut eorum qui ab eo tempore huc usque defuncti sunt successiones hoc
modo tractentur, nisi qui iam transegerint aliove modo inter se pacti
fuerint. Si enim tale aliquid factum 2 sit,
id in sua auctoritate permanere nulloque modo commoveri iubemus. Participes
autem eas etiam praediorum, quae genearchica vocantur, a praedicto tempore
esse volumus. Si qui tamen inveniantur, qui filias, quamquam ad successionem
ab intestato non vocantur, tamen heredes scripserint, illae et qui ex
illis nati fuerint successionis in res genearchicas participes sint. |
Epilogus. Quae
igitur nobis placuerunt et hac sacra declarantur lege, excellentia tua
et custodire et effectui tradere studeat, ut leges nostrae per omnia
valeant auctoritatemque habeant ; incipiente quidem praesenti lege
ab initio imperii nostri, ut iam diximus, in omne vero tempus patente
et in posterum omnibus modis vim habente atque ab omnibus observanda. |
Dat.
X. kal. Aug. Belisario vc. cons. |
| |