~  ED. II  ~    NE PRAESIDES IN FISCALIBUS CAUSIS ASYLI IUS DENT.    ( AD ? )

( Based upon the Latin text of Schoell and Kroll's edition ). ~   Translated from the Greek   ~

Idem Imperator Ioanni praefecto praetorio.

Praefatio. Ex iis, quae sine scripto a gloria tua ad nos relata sunt, cognovimus non exiguam publicorum tributorum illationi difficultatem attulisse provinciarum praesides, dum quibuslibet ius asyli dant. Hinc enim eos, qui tributa publica suscipiunt, sibi securitatem praetendentes, non transmittere aurum ipsis solutum, maximamque partem ipsos retinere, et cum aurum debeant, iure asyli male ipsis dato abuti. 1 Sancimus igitur hac sacra pragmatica forma utentes ad excellentiam tuam, ut per edicta sua omnibus clarissimis provinciarum praesidibus interdicat, ne in fiscalibus causis ius asyli dent, sed in privatis solis causis iis liceat petentibus asyli ius dare atque ad certum tempus, ita ut non in perpetuum possint elapso spatio eam denuo renovare. Scientibus omnibus, nullum fructum se esse percepturos, si tale ius ab eis acceperint ; sed licebit cuivis comprehendere eos, cui imperatur ut ab illis debita publica tributa solvat, ita ut ius in provincia iis datum ad nullam rem ipsis utile sit, sed illi soli securitatem habeant, qui ex sacra nostra iussione aut excellentiae tuae mandatis ius asyli acceperint.

I. Quoniam autem a gloria tua edocti sumus nonnullos in diversas provincias profectos ad inquisitionem eorum, qui se haereticorum errori dedidissent, multis subditis hac de causa comprehensis sportularum nomine plurimum auri ab eis accepisse, sancimus, ut qui tale aliquid ausi sunt et comprehendantur et ad clarissimos provinciarum praesides ducantur, et post probationes quod acceperint in triplum solvant, et simplum iis ipsis qui damno affecti sunt reddant, duplum vero fisco inferatur. 1 Qui autem in vicariana cohorte, quae spectabili Asianae dioeceseos vicario apparet, constituti sunt, suo bonorumque suorum periculo publicorum tributorum illationem faciant, cum defecerint, ut hoc quoque ad nostram pietatem excellentia tua rettulit, ii qui ad provincialem cohortem pertinent et ad paucos admodum redacti sint, e multo autem tempore vicarius etiam clarissimi provinciae praesidis Phrygum Pacatianorum gentis magistratum susceperit ; licentia data iis, qui in vicarianam cohortem relati sunt, ut iussu vicarii et qui nunc est et pro tempore futurus est publicas contributiones exigant easque fisco inferri curent. 2 Provinciales vero susceptores in una quaque provincia constitutos in apochis ab eis confectis solutum ipsis aurum distincte inscribant et discernant solutam ipsis quantitatem occasione eorum, quae tuae excellentiae mensae, et quae sacris nostris largitionibus competunt, et per huiusmodi securitates persolutam quantitatem manifestent, neque ex aliis titulis in alios transponere cuiquam liceat.

Epilogus. Quae igitur nobis placuerunt et per hanc sacram pragmaticam declarantur legem, excellentia tua ad effectum perduci iubeat.