~  APP. IV  ~    NE QUIS METETUR OB OCCASIONES PRIVATAS AUT PUBLICAS.    ( AD ? )

( Based upon the Latin text of Schoell and Kroll's edition ). ~   Translated from the Greek   ~

Idem imperator . . .

Exercitum nobis res publica ideo alit . . .

1 Nemo magistratuum aut rationalium aut ceterorum qui publica tractant metato domum cuiusquam propter debita publica, sed si debitores intra domos abscondi existimat, publicis utatur personis ad eos indagandos ; atque si eos invenit, publice producat et exactionem faciat nullo modo domos molestans. Si vero etiam militari indigeat auxilio ad publicorum exactionem, non utatur ad hoc militibus modo conscriptis, sed eis qui in rebus triti sint et rei publicae ordinem cognitum habeant et exactionem non in domibus, sed publice faciant cum debita devotione.

2 Omnino autem omnes vetat constitutio ob occasiones privatas militibus uti aut ullum cuiquam per eos dolum parare ; scientibus qui tale aliquid facere conantur se etiam omni actione quam fere lex eis dabat contra debitores privatum iri ob ipsum solum conatum. 3 Milites autem ad exactionem publicorum delegatos iubet sportulis accipiendis omnino abstinere ac nihil omnino a quoquam accipere, sed propriis contentos esse annonis. 4 Eorum autem quae dicta sunt omnium custodiam et episcopis et magistratibus locorum committit.

5 Praeterea vetat magistratus et ceteros omnes domum cuiusquam destruere nisi propterea, ut cum domus domino renovet(?), ita tamen ut novo opere alius non offendatur ; ei qui hoc fecit damni domus domino illati per duplum restitutionem et poenam decem librarum auri imponens et imperatoris iram his observandis et a magistratibus et ab iis qui publica tractant. Scripta est . . .