NOV. XX [Haenel XV]    DE CORPORATIS URBIS ROMAE QUI AD MILITIAM     VEL AD CLERICATUM TRANSIERINT REVOCANDIS.    (445 Apr. 14)

( Based upon the Latin text of Mommsen and Meyer's edition, Berlin, 1905 ). ~   Text submitted by Dr. Ingo Maier   ~

Impp. Theodosius et Valentinianus aa. Auxentio II. praefecto urbi. Quaecumque utilitatem sacratissimae urbis respiciunt, oportet clementiam nostram salubriter ordinare. Providam itaque amplitudinis tuae et geminis fascibus conprobatam suggestionem secuti, Ausenti parens karissime atque amantissime, inlustris magnitudo tua pragmatici nostri tenore conperto sciat corporatum urbis Romae, qui non expleto ordine coepti officii, priusquam ad primum inter suos locum emeritus pervenerit, ad militiae cuiuslibet cingulum se crediderit transferendum, corpori, cui nomen suum ante dicaverat, oportere revocari; sive etiam in clericorum numero repperitur, usque ad subdiaconis locum similis praecepti condicio teneatur, quatenus necessitatibus urbis venerabilis hoc salubri constituto restitutis ministeriis consulatur. Dat. XVIII. kal. mai. Romae, Valentiniano a. VI. et Nomo vc. conss.